காற்றில் வரும் கீதமே…

இசை பிரியர்கள் அனைவருக்கும் இனிய தீபாவளி நல்வாழ்த்துகள் !

ஜாதி மல்லிப் பூச்சரமே, சங்கத் தமிழ் பாச்சரமே என்றொரு தமிழ்த் திரைப்படப் பாடல் வரி உண்டு. ‘புஷ்பேஷு ஜாதி’ என்றொரு சொற்றொடர் வடமொழியில் உள்ளது. அதன் பொருள் பூக்களில் உயர்ந்தது ஜாதி என்பதாகும். இந்தப் பாடலில், தலைவன் தலைவியை சாதிமல்லிப் பூச்சரமே என்கிறான். மலர்களில் உயர்ந்த மலர் போன்றவள் நீ என்று சொல்லிவிட்ட பிறகு வருகிற அதற்கு அடுத்த வரி இன்னும் சிறப்பான ஒன்றைக் கொண்டிருக்க வேண்டும். ஆகவே சங்கத் தமிழ் பாச்சரமே என்கிறான். தமிழே இனிமை, சங்கத்தமிழ் அதனினும் இனிமை. அப்படிப்பட்ட சங்கத்தமிழில் இயற்றப்பட்ட பாடல் நீ, அதுவும் ஒரு பாடல் இல்லை, பல பாடல்களைக் கொண்ட சரம் நீ என்கிறான்.

குழலுடன் கண்ணன்அருமையான ஓசை நயம் கொண்ட, கேட்பதர்க்கினிய ராகத்தில் அமைந்த சங்கத் தமிழ் பாடல்களுக்கு இணையான பாடல்கள் சில தமிழ் திரைப்படங்களில் அமைந்து விடுவது உண்டு. ஒருநாள் ஒரு கனவு என்கிற ஓரிருநாள் மட்டுமே ஓடிய ஒரு திரைப்படத்தில் இளையராஜா இசையில் வாலியின் வளமையான வரிகள் கொண்ட ‘காற்றில் வரும் கீதம்’ என்கிற பாடல் நான் மேலே குறிப்பிட்டுள்ள வகைப்பாடல்களில் சேரும்.

சொட்டும் பக்திரசமாகட்டும், பைந்தமிழ் வரிகளாகட்டும், செவிக்கினியதோர் மதுரமான ராகமாகட்டும்…. எல்லா விதங்களிலும் இப்பாடல் ஒரு அற்புதமான தமிழ்ப் பாசுரத்திற்கு நிகரானது.

கல்யாணி ராகத்தில் அமைந்த பாடல். இதே ராகத்தில் இளையராஜாவின் வேறு சில குறிப்பிட தகுந்த பாடல்கள் : அம்மா என்றழைக்காத… *மன்னன் ; சுந்தரி கண்ணால் ஒரு சேதி… *தளபதி. பாடல் உருவான விதம், ராஜாவும் வாலியும் மேற்கொண்ட உரையாடல் சுவையானது. நீங்களும் கேளுங்கள் :

கதையின் நாயகி கதாநாயகனின் இல்லத்துக்கு முதல் முறையாக வருகிறாள். பக்தனின் பாடல் கேட்டுத் தாழ் திறந்த ஆலய மணிக் கதவைப்போல் ஒரு பாடலோடு திறக்கிறது கதாநாயகனின் வீடு. ஒரு பாடலைக் கடனே என்று பாடாமல் இறைவனுக்கும் நமக்குமான பரிபாஷையே இசைதான் என்கிற உணர்வோடு, பாடலில் லயித்து ஆத்மார்த்தமாகப் பாடுவதை, பெரியோர் ‘நாத உபாசனை’ என்பார்கள். அப்படி இசையையே இறையாக எண்ணி வாழும் ஒரு குடும்பத்தில் உள்ள அனைவரும் சேர்ந்து பாடுவதாக அமைந்து இருக்கறது இப்பாடல். கண்ணனை வர்ணிக்கத் துவங்கினாலும் இப்பாடல் இசை என்கிற கண்ணனுக்கும் நமக்கும் நடுவில் உள்ள பாலத்தை சொற்களால் அலங்கரிக்கிறது.

பாடலாசிரியர்: வாலி
படம்: ஒரு நாள் ஒரு கனவு 
இசை: இளையராஜா
பாடியவர்கள்: இளையராஜா, ஹரிஹரன், சாதனா சர்கம், ஷ்ரேயா கோஷல், பவதாரணி 
ராகம் : கல்யாணி

காற்றில் வரும் கீதமே,
என் கண்ணனை அறிவாயா…..

காற்றில் வரும் கீதமே,
என் கண்ணனை அறிவாயா…..

அவன் வாய்க் குழலில் அழகாக
அமுதம் ததும்பும் இசையாக
மலர்ந்தாய்… நடந்தாய்…
அலைபோல் மிதந்து…

காற்றில் வரும் கீதமே,
என் கண்ணனை அறிவாயா…

பசு அறியும் அந்த சிசு அறியும்
பாலை மறந்து அந்த பாம்பறியும்

வருந்தும் உயிருக்கு……..
ஒரு மருந்தாகும்..
இசை அருந்தும் முகம்
மலரும் அரும்பாகும்
இசையின் பயனே
இறைவன் தானே…

காற்றில் வரும் கீதமே,
என் கண்ணனை அறிவாயா….

ஆதார ஸ்ருதி அந்த
அன்னை என்பேன்
அதற்கேற்ற லயம்
எந்தன் தந்தை என்பேன்

ஸ்ருதிலயங்கள் தன்னைச்
சுற்றும் ஸ்வரங்கள் எல்லாம்
உறவாக அமைந்த நல்ல
இசைக் குடும்பம்

திறந்த கதவு என்றும் மூடாது
இங்கு சிறந்த இசை
விருந்து குறையாது
இதுபோல் இல்லம்
எது சொல் தோழி…

காற்றில் வரும் கீதமே,
என் கண்ணனை அறிவாயா…..

அவன் வாய்க் குழலில் அழகாக
அமுதம் ததும்பும் இசையாக
மலர்ந்தாய்… நடந்தாய்…
அலைபோல் மிதந்து…

கவிஞர் வாலியின் தெய்வீக வரிகளுக்கு உயிர் தந்து இந்தப் பாடலை அழகுக்கு அழகு சேர்க்கும் விதமாய் ஆக்கியோர்: இளையராஜா, ஹரிஹரன், சாதனா சர்க்கம், ஷ்ரேயா கோஷல் மற்றும் பவதாரணி ஆகியோர். இறுதியில் வரும் கல்யாணி ராகத்தின் ஆலாபனை  மட்டுமே ரசிக்க.  பாடலின் சுட்டி கீழே:

இசைப்பா முதலாம் ஆண்டு வெற்றியை நோக்கி பயணம் செய்கிறோம். அதன் பொருட்டு சிறந்த பாடல்களின் சிறப்பு வரிசை இந்த பாடலுடன், இனிப்பு தீபாவளியுடன், இளையராஜாவுடன், இன்ப வாலியுடன், இசையுடன், இறையுடன் தொடங்குகிறது !

மேலும் உங்கள் வரவுக்கு நன்றி. தளம் மேம்பட உங்கள் கருத்துகளை சொல்லலாமே. நீங்களும் பங்கு பெறலாம், பகிரலாம் 🙂

இசையில் தொடங்குதம்மா

ராஜா பிறந்த இந்த வாரத்தில் மேலும் ஒரு சிறப்பு பதிவு ! ஹே ராம் படத்தில் வரும் ’இசையில் தொடங்குதம்மா’ என்ற பாடலை வெகு நாட்களுக்குப் பிறகு கேட்க நேர்ந்தது. ராஜாவின் சிறந்த பாடல்கள் கொண்ட ஒரு பிளே லிஸ்டை (playlist)  எப்போது யார் தயாரித்தாலும்   நிச்சியம் இப்பாடல் அதில் இடம் பெறும்.

ராஜா
ராஜா

இந்தப் பாடலுக்கான காட்சியை இயக்குனர் கமல் எப்படி விளக்கி இருக்கமுடியும் என்று எண்ணுவதே எனக்கு வியப்பைத் தருகிறது. அந்தப் பாடலுக்கான சூழலை மிகச்சரியாகப் புரிந்து கொண்டவரால் மட்டுமே இப்படிப்பட்ட ஒரு இசைக்கோர்ப்பினை உருவாக்க இயலும்.

மிக அபூர்வமாக இசைக்கப்படும் விவாஹப்ரியா ராகத்தில், சாஸ்த்ரிய மற்றும் ஹிந்துஸ்தானி சங்கீதங்களின் கலவையை தனது தமிழ் கவிதைத் தேனில் குழைத்து ராஜா வார்த்த சிலை இப்பாடல். ஆம், இப்பாடலை எழுதியவரும் அவரே.

காட்சிகளின் படி கதாநாயகன் மதுவின் போதையில் இருக்கிறன்.  தோலக், தபலா, முழவுகள், ராம லீலா உத்சவத்தின் போது இசைக்கப்படும் கொட்டுகள் என இப்பாடலின் இசையே போதையுட்டுகிற பல்வேறு இசைக்கலவைகளைக் கொண்டிருக்கிறது. அஜய் சக்ரபர்த்தி பாடியிருக்கிறார். என்ன அற்புதமான ஒரு குரல் தேர்வு. அஜய் சக்ரபர்த்தியைத் தவிர வேறு யாரும் இந்தப் பாட்டுக்கு, அதனுடைய அதிஅற்புத இசைக்குத் தன் திறமையால் குரல்வளத்தால் நியாயம் செய்துவிட முடியாது. குரல் குழைந்து, மிளிர்ந்து, மயங்கி, மயக்கி, தவித்து, வழுக்கி கேட்பவனுக்கு இசை என்கிற ராஜ போதையைத் தந்து நம்மை உன்மத்தமாக்குகிறது.

ரசிகனை எங்கோ விரல் பிடித்து அழைத்து செல்லக்கூடிய எத்தனயோ பாடல்களைத் தந்திருக்கிறார் ராஜா. அவற்றுள் இப்பாடல் தலையாது என்றே நான் கருதுகிறேன். பேக்பைப்பர் பின்னால் செல்லும் எலிகளைப் போல நான் ராஜாவின் பாடல்கள் பின்னால் அலைகிறேன். விளக்கின் சுடரைப்போல இப்பாடல் சதா என் நினைவுகளில் அலைந்து கொண்டிருக்கிறது.

படம்: ஹேராம்
பாடல்: இசையில் தொடங்குதம்மா
பாடலாசிரியர்: இளையராஜா
இசை: இளையராஜா
பாடியவர்: அஜய் சக்ரபர்த்தி 

இசையில் தொடங்குதம்மா  
விரக  நாடகமே
வசந்தம் கண்டதம்மா
வாடும் வாலிபமே

வசந்த கோலங்களை
வானின் தேவதைகள்
கண்டு ரசிக்க
வந்து கூடிவிட்டார்
இங்கு நமக்கு ஹோ..
(இசையில்..)

தேய்ந்து வளரும்
தேன் நிலாவே 
மண்ணில் வா
தேய்ந்திடாத  தீபமாக  
ஒளிர வா

வானத்தில்.. வானத்தில் மின்னிடும்
வைரத்தின் தாரகைத் தோரணங்கள்
பூமிக்கு கொண்டு வா

(இசையில்..)

நாளில் பாதி இருளில் போகும்
இயற்கையில் வாழ்வில்
பாதி நன்மை தீமை தேடலில்
உயிர்களே… உயிர்களே
உயிர்களே உலகிலே இன்பத்தை
தேடி தேடி கிரஹத்துக்கு வந்ததே

(இசையில்..)

ஒரு முறை பார்த்திபன் சொன்னார் ‘பழையன கழிதல் – என்கிற விஷயம் துளியும் பொருந்தாது ராஜாவின் பாடல்களுக்கு மட்டுமே’ என்று. அதை அனுபவபூர்வமாக உணர்த்துகிற பாடல்களில் இதுவும் ஒன்று. இந்த வாரம் ராஜாவின் பிறந்தநாள். அதற்காக அவருக்கு வாழ்த்து சொல்ல வேண்டுமே! கவிஞர்  வாலி அவரைப் பற்றிச் சொன்ன வரிகளை இங்கே தந்திருக்கிறேன்.

‘உன் தேகமெல்லாம் ராகம்..! உன் நாளமெல்லாம் தாளம்..! உன் குருதியெல்லாம் சுருதி..! நீ இசைஞானி இல்லை இசைமேனி..!– வாலி

பாடல் சொல்கிற கதை

தவமாய்த் தவமிருந்து படத்திலிருந்து ரெண்டு பாடல்கள் 

ஒரே மெட்டு, வெவ்வேறு வரிகள், ரெண்டு பாடல்களிலும் ஒரே கதை மாந்தர்கள் ஆனால் இரு வேறுபட்ட சூழல்கள்

பாடலைத் தேன்மொழி என்கிற கவிதாயினி எழுதி இருக்கிறார். சபேஷ் முரளி இசை அமைத்து, பிரசன்னா பாடி இருக்கிறார்

முதல் பாடல் –  நானே தொலைந்த கதை நானறியேன் கண்மணியே 

நானே தொலைந்த கதை நானறியேன் கண்மணியே
காதல் நுழைந்த வழி கண்டறிவாய் காதலியே

விண்ணில் மழைத் துளிகள் மின்னலாய் நின்றுவிட
மண்ணில் எனது நிழல் உன்னைப்போல மாறி விட
விரலோரம் கவிதை ஊறியதே
விழியோரம் காதல் கசிகிறதே
நதி மேலே ஓற்றைக் காலில் மழை ஆடும் ஆனந்தமாய்
கனவு ஊறும் மனசுக்குள்ளே
காதல் வந்து ஓற்றைக் காலில் சுற்றி சுற்றி மூழ்கடிக்குதே

நானே தொலைந்த கதை நானறியேன் கண்மணியே

உன் இதயம் நான் படிக்க கள்வனாய் மாறி வந்தேன்
என்னைப் போல நீயும் ஓரு கள்ளி என கண்டு கொண்டேன்
என் விரலை உன் விரலால் இரவினில் தீண்டுகிறேன்
முத்தமென்று தண்ணீரை முகத்தினில் ஊற்றுகிறேன்
உன் முகம் தேடி காலையில் வெயிலாகிறேன்
உன் குரல் தேடி சாலையில் குயிலாகிறேன்

தேர்வு அறை முழுதும் தேவதையே உன் நினைவு
நாளை விடுமுறையாம் காதல் வதை உன் பிரிவு

கண்கள் எனை மறந்து உன்னையே தேடியது
சுவாசம் உன் பெயரை என்னுள்ளே பாடியது
லேசாக சண்டை போடவா
பேசாமல் முத்தம் கேட்கவா
வெயில் காயும் சாலையிலே மழை தூவும் ஆனந்தமாய்
தனிமை நீங்கும் வேளையிலே
காதல் நம்மை காற்றைப் போல எங்கோ எங்கோ கொண்டு செல்லுதே….

கல்லூரிக் காலத்தில் பூக்கிற காதல், காதலனின் மனதில் பொங்குகிற எண்ணங்கள், அவனுக்குள்ளே காதல் ஏற்படுத்துகிற மாற்றங்கள், அந்த மாற்றங்களை அவன்  வெளிப்படுத்துகிற விதம்,  காதலியின் பார்வைக்காக, அவள் காட்டுகிற அன்புக்காக அவன் ஏங்குகிற ஏக்கம், அவளைக் காண வேண்டும் என்கிற  தவிப்பு எனப் பல்வேறு உணர்ச்சிகளின்  கலவை இந்தப் பாடல்.

இந்த ரெண்டு வரிகள் போதும்  காதலை, அதன் வீரியத்தை, அவன்

பிரிவுத்துயரைச் சொல்ல:

தேர்வு அறை முழுதும் தேவதையே உன் நினைவு
நாளை விடுமுறையாம் காதல் வதை உன் பிரிவு

அவளைப் பிரிந்திருப்பதின் வேதனையை  அறிந்தவன் அவன் மட்டுமே. இதைக் கல்லூரிக் காலத்துக் காதலன்கள் எவரும் உணராது போனதில்லை. ரெண்டு காய்ந்த ரொட்டித் துண்டுகளுக்கு இடையே இருக்கிற சுவையான பழ  ஜாம்  மாதிரி இருக்கிறது  இந்த சனி ஞாயிறு விடுமுறைக்கும் அடுத்த சனி  ஞாயிறு நடுவில் உள்ள கல்லூரி வேலை நாட்கள் அவனுக்கு.

அடுத்த பாடல்: உன்னைச் சரணடைந்தேன் உன்னுள்ளே நான் கலந்தேன் 

உன்னைச்  சரணடைந்தேன்

உன்னுள்ளே நான் பிறந்தேன்
என்னில் உறைந்திருந்தென்
உன்னுள்ளே நான் கரைந்தேன்
கண்கள் இமையை விட்டு உன்னையே நம்பி நிற்க
ஸ்வாசம் காற்றை விட்டு உன்னையே தேடி செல்ல
தாயாக மாறிப் போனாயே
வேராகத் தாங்கி நின்றாயே
அயராது ஒடும் நெஞ்சின் இசையாக நீ இருக்க
கண்ணீர் ஊறும் ஆழத்திலே காலமெல்லாம் உப்பைப் போலே
உந்தன் உள்ளே நான் இருப்பேனே

உன்னைச் சரணடைந்தேன்
உன்னுள்ளே நான்பிறந்தேன்

தினம்தொறும் சாமிகிட்ட
தீராத ஆயுள் கேட்டேன்
நீ பார்க்கும் பார்வை போல
பூவெல்லாம் பூக்க கேட்டேன்
நீ நடக்கும் நிலத்தினிலும் நிம்மதி வளர்த்திடுவேன்
நீ அருந்தும் நீரினிலும் தாய்மையைத் தந்திடுவேன்
உன் உலகத்தின் மீது நான் மழை ஆகிறேன்
உன் விருப்பங்கள் மீது நான் நதி ஆகிறேன்

உன்னைச் சரணடைந்தேன்
உன்னுள்ளே நான்பிறந்தேன்
என்னில் உறைந்திருந்தென்
உன்னுள்ளே நான் கரைந்தேன்
காதல் என்ற சொல்லில் காதலே இல்லை என்பேன்
வாழும் வாழ்க்கை இதில் காதலாய் வாழ்வோம் என்பேன்
சொந்தங்கள் யாவும் ஆனாயே
சோகங்கள் ஆற்றி விட்டாயே
அடை காக்கும் தாய்க்குருவி
சிறகாகி நீ அணைக்க
முட்டைக் கூட்டின் ஓடுடைத்து
முட்டி மோதும் குஞ்சைப் போல தினமும் புதிதாய் நான் பிறப்பேன்

திருமணம் முடிந்தது, தாய் தந்தையரைப் பிரிந்து அவனுக்கு  இவள் தாயாய், இவளுக்கு அவன் தந்தையாய் வாழ்கிற வாழ்வைச் சொல்லும் பாடல்.

இந்தப் பாடலில் ‘காதல் என்னும் சொல்லில் காதலே இல்லை என்பேன்‘ என்று ஒரு வரி.  காதல் என்பது வார்த்தைகளில் இல்லை. வாழ்ந்து காட்டுவதில் இருக்கிறது என்பது  புரிந்து விட்ட பிறகு அவனுக்குத் தோன்றுகிற எண்ணம் இது. எத்தனயோ ஆயிரம் சொற்கள் இருக்கிற ஒரு மொழியில், தன் அன்பைச் சரிவர விளக்க ஒரு தமிழ்ச் சொல் கிடைக்காது தடுமாறுகிற  கணம் அது. சொற்களற்ற மவுனத்தில் கூட காதலைச் சொல்ல முடியும். ஆனால் இருப்பதிலேயே சிறந்த வழி காதலாய் வாழ்வதுதான் என்கிறது இப்பாடல்.

ஒரு பாடலைத் துளியும் சிதையாது காட்சிப்படுத்துவதில்தான் இயக்குனரின் திறமை வெளிப்படும். சேரனுக்கு அது கை வந்த கலை.  முதல் பாடலில் காதலில் தவிக்கும் ஒரு காதலனாய் , அடுத்த பாடலில் ஒரு கணவனாய், ஒரு தப்பனாய், வாழ்வின் பொருள் உணர்ந்து கொண்டவனாய், காதலின் எல்லாப் பரிமாணங்களையும் புரிந்தவனாய்த் தன்  கதாபாத்திரத்தைக் குறைவறச் செய்திருக்கிறார். நல்ல பாடல், கேட்டு/பார்த்து  மகிழுங்கள்.