தாயும் கொஞ்ச காலம்…

வைரத்தின் வரிகளுடன், வந்தனம் !

இன்று தனது அறுபதாம் பிறந்தநாளை தமிழ் நடையுடன், கோவையில் துவங்கி உள்ளார் கவிஞர் வைரமுத்து. சிவானந்தா காலனி முதல் காந்திபுரம் வரை சென்ற பேரணியில் : கல்லூரி மாணவ மாணவிகள், அறிஞர்கள், படைப்பாளிகள், சர்வ சமயத்தை சார்ந்த பெருமக்கள், சகல சமூகத்தை சார்ந்த பொதுமக்கள், தமிழ் ஆர்வலர்கள், தமிழ் காதலர்கள் என பலரும் கலந்து கொண்டனர்.

தமிழ் நடையின் நோக்கம், மூன்று அம்ச கோரிக்கை :

  • தமிழ்நாட்டு எல்லைக்குள் இயங்கும் எல்லா பள்ளிகளிலும் தமிழ் ஒரு கட்டாயப் பாடமாக, கற்பிக்கபட வேண்டும்.
  • நீதிமன்றங்களில் தமிழ் வழக்காடு மொழியாக திகழவேண்டும். துணைக் கோரிக்கை : மத்திய அரசின், தமிழ்நாட்டில் இயங்குகின்ற எல்லா அலுவலகங்களிலும் தமிழ் பயன்படுத்துபட வேண்டும்
  • திருக்குறள் மதசாரப்பற்றது,மனித நேயம் மிக்கது. எனவே அதை தேசிய நூலாக விளங்கப்பட வேண்டும் என்று விரும்புகிறோம்

vairamuthu 60

பாடலின் பக்கம் திரும்புவோம். தத்துவங்களை அள்ளி அள்ளி தூவுவதில் வல்லுனர் வைரமுத்து. (பெற்ற அனுபவங்கள் இன்னும் நாற்பது வருடங்களுக்கு போதும் என அவரே சொல்லியுள்ளார் !) சமீபத்தில் வெளிவர உள்ள கங்காரு படத்தில் இப்படி ஒரு பாடல் உள்ளது. மொத்தமும் விரக்கிதில் தோய்ந்த நாயகனை நோக்கி பாட படும் பா. அழுத்தமான தத்துவ பாடல், வாழ்வின் நிலையாமை பற்றிய பாடல்.

அலட்சியமான தொனியில் ஆயிரம் கருத்துகளை சொல்லுகிறது. மிதப்பான ஒரு ஞானி பாடும் கீதம். அழுத்தமே இல்லாத இசை. படிப்படியாக வயதுடன் கூடிய சுய மதிப்பு. சோகத்தை குழைத்து தெளிக்கும் உணர்வு. மெல்லி பீட்ஸ். வைரமுத்து சொன்னது போல : ஒரு பனித்தரையில் ஆப்பிள் வழுக்கி லாவகமாக போகிற மாதிரியான குரல். பாடியவர், “ஊதா கல ரிப்பன்” புகழ் ஹரிஹரசுதன். அட்டகாசமான இசையை முதல் படத்திலேயே, தேனாய் பொழிந்துள்ளவர் : பாடகர் ஸ்ரீநிவாஸ்.

இந்த பாடலின் காணொளி மட்டும் வெளிவந்துள்ளது. (கீழே இணைப்பு உள்ளது.) தம்பி ராமையா முழுவதும் ஆடிய முதல் பாடல் இதுவாக தான் இருக்கும். நல்ல முயற்சி. வாழ்த்துக்கள்.

vairamuthu handwriting

படம் : கங்காரு
பாடலாசிரியர் : வைரமுத்து
இசையமைப்பாளர் : ஸ்ரீநிவாஸ்
பாடல் : தாயும் கொஞ்ச காலம்…
பாடியவர் : ஹரிஹரசுதன்

கருவழியா வந்ததெவும்
நிரந்தர மில்ல !
கட்டையில போகுறவரையில்
சுதந்திர மில்ல !
இங்கு சுதந்திரமில்ல !
ஏதும் நிரந்தரமில்ல !

தாயும் கொஞ்ச காலம்,
தகப்பனும் கொஞ்ச காலம்.
ஊரும் கொஞ்ச காலம் – அந்த
உறவும் கொஞ்ச காலம்.

தாயும்…

நெனச்சு நெனச்சு பார்த்தாக்கா
நீயும் கொஞ்ச காலம்
உன் நெனபும்
கொஞ்ச காலம்

சரித்துரத்து மன்னர்களும்
கொஞ்ச கொஞ்ச காலம்
அந்த சந்திரனும் சூரியனும்
இன்னும் கொஞ்ச காலம்
இன்னும் கொஞ்ச காலம்

தாயும்…

எட்டாத மல மேல
கடவுள் இருக்குது
அத எட்டிவிட மனுசபய
இதயம் துடிக்குது

சொந்தம் பந்தம் கூடி வந்து
காலை இழுக்குது
அட சொத்து பத்து ஆச வந்து
கைய அமுக்குது

காம வேரு கடைசிவரைக்கும்
கழுத்த பிடிக்குது….
இது கடவுள் கிட்ட போற
வழி எங்க இருக்குது ?

கட்டயில போற வரையில்
சுதந்திரம் இல்ல
தெரு வழியா வந்த ஏதுவும்
நிரந்திரம் இல்ல

முப்பதுக்கு மேல உனக்கு
முடி உதிருது – அட
நாப்பதுக்கு மேல பார்வ
நடுக்கமாகுது
அம்பதுக்கு மேல பல்லு
ஆடி போகுது – அட
அறுபதுக்கு மேல ஆண்ம
அடங்கி போகுது

ஒடம்போட பொறந்ததெல்லாம்
உன்ன பிரியுது… – இதில
உன் கூட பிறந்ததுவா
இருக்க போகுது ?

கட்டயில போற வரையில்
சுதந்திரம் இல்ல
தெரு வழியா வந்த ஏதுவும்
நிரந்திரம் இல்ல
தாயும்…

மேலும் பல சிறப்புப் பாடல்களுடன், உங்களை சீக்கிரம் சந்திக்கிறோம். தமிழ் வாழ்க ! இசை வாழ்க !

vairamuthu click

Advertisements

நெஞ்சுக் குழிக்குள் முள்ளு மொளச்சா…

காதலர் தின நல்வாழ்த்துகள். காதல் – இந்த சொல்லுக்கு தான் எத்தனை எத்தனை உணர்வுகள்.

பழமையின் புதுமை இது.
புதுமையின் பழமையும் இதுவே.
பல வேளைகளில் புரியாத புனிதம்.
சில சமயங்களில் சிலிர்க்கும் சில்மிஷம்.
வளர்ந்ததுக் கொண்டே வரும் ஒரு ஆற்றல் இந்த காதல்.

காதலை மையமாகக் கொண்டு பல்லாயிரம் பாடல்கள் வெளிவந்துள்ளன. ஆனாலும் இன்னும் தீரவில்லை, போதவில்லை. கேட்க கேட்க இன்பம், நினைக்க நினைக்க பூரிப்பு தான். கவிஞர் வைரமுத்து அவர்களின் பாடல் இன்றைய சிறப்பு பதிவு. பத்ம விபூஷன் விருது பெற்ற தமிழ்ப் புதல்வனின், முத்தான வரிகளில், சிலிர்ப்பூட்டும் காதல் கீதம்.

vairamuthuசமீபத்தில் அவர் எழுதி வெளிவந்த காதல் பாடல் இதுவாகத்தான் இருக்கும். கங்காரு என்னும் படத்தில் இடம் பெற்றுள்ள பாடல். ஸ்ரீநிவாஸ் அவர்களின் துள்ளல் இசை. அவர்தம் புதல்வி சரண்யா-வின் துடிப்பான குரலுடன் விஜய் பிரகாஷ்-சின் துள்ளல் குரலும்.

காதலுக்கு தான் அடுக்கடுக்காக உவமைகளை சேர்த்து, கதம்பமாக அமைத்த கவிஞரை பாராட்ட வார்த்தைகள் இல்லை. இசை நம்மை ஆளட்டும். திசை எங்கும் பரவட்டும்

படம் : கங்காரூ
பாடலாசிரியர் : வைரமுத்து
பாடியவர்கள் : சரண்யா ஸ்ரீநிவாஸ், விஜய் பிரகாஷ்
இசை : ஸ்ரீநிவாஸ்

நெஞ்சு குழிக்குள் முள்ளு மொளச்சா,
காதல் வந்தததென்று அர்த்தமா ?
பட்டாம்பூச்சிக்கு பல்லு மொளச்சா,
காதல் வந்தததென்று அர்த்தமா ?

உச்சந் தலைக்குள்ள ஊசி வெடி போட்டு,
கிச்சு கிச்சு பண்ணும் காதல்!
உசுர மட்டும் விட்டு ஒவ்வொன்னாக தின்னு,
கலகமெல்லாம் பண்ணும் இந்த காதல்!

நெஞ்சு…

ஓ வெக்கம் எல்லாம் போலி தானே,
மேய சொல்லும் வேலி தானே.
போ போ என்னும் வார்த்தைக்கெல்லாம்,
வா வா என்று அர்த்தம் தானே.

ஏரித் தண்ணி இருந்தும் தாகம்
போகவில்லை போடி
மொத்த தாகம் போக வேணும்
முத்தம் ஒன்னு தாடி

முத்தம் என்றால் வெறுப்பு
அது எச்சில் வைத்த நெருப்பு
கெட்ட வார்த்தை சொன்னானே

நெஞ்சு…

ஓரம் சாஞ்சு தொட்டு கொண்டேன்
பாரம் கொஞ்சம் தொட்டால் என்ன ?
ஓரம் தொட்டு உசுரு போச்சே
பாரம் தொட்டால் என்ன ஆகும் ?

தள்ளி போட காதல் ஒன்னும்
தேர்தல் இல்லை வாடி
தப்பு பண்ணும் சந்தர்ப்பத்தை
தந்து விட்டு போடி

அத்தை பெண்ணாய் நினைத்தாய்
அத்து மீற துணிந்தாய்
கன்னி பெண்ணின் உள்ளத்தை
கலைகிறாய்

நெஞ்சு…

மறைந்த இயக்குனர் பாலு மகேந்திரா அவர்களுக்கு இசைப்பா குழுவின் ஆழ்ந்த இரங்கல்.

காதலர் தின நல்வாழ்த்துகள்!

பேஞ்சாக்கா மழத் துளியோ…

கங்காரு என்னும் படத்தில் , பாடகர் ஸ்ரீனிவாஸ், இசையமைப்பாளராக வளர்ந்து, பரிணமித்துள்ளார். பாடல்கள் அனைத்தும் சுகம். ஏ.ஆர்.ரஹ்மான்-னிடம் வேலை பார்த்த அனுபவம் மிளிர்கிறது.

பாடலை பற்றி கவிஞர் : அந்த ஊரில் ஒரு முரடன், அவனை ஒருத்தி காதலிக்கிறாள். புனிதமே வடிவானவள் காதலி; அவளுடைய தாய் ஒரு விலைமகள். இந்த விலைமகள் பெற்ற திருமகளை அவன் காதலிக்க மறுக்கிறான். அவ : வாழ்ந்தா உன் கூட தான், இல்லைனா எனக்கு வாழ்கை இல்ல! என்னை ஏன் நிராகரிக்கிறாய் ? என்று  கெஞ்சியும், கொஞ்சியும், மிரட்டியும் பாடுகிற பாடல்

இதற்கு மேல் வைரமுத்துவே மெட்டைப் பாடி, அதற்கு தான் எழுதிய பாடலையும் பாடுகிறார். மனிதர் ஏன் பாடல்களைப் பாடுவதில்லை என்று யோசிக்க வைக்கிறது குரல்.

kangaroo release

இந்த காணொளி சூப்பர் சிங்கர்ஸ் நிகழ்ச்சியில் வந்த போதே பாடல் பிடித்தது. பாடல் வெளியான பின் முதலில் கேட்டதும் இதுவே. ஸ்வேதா மோகன் அவர்களின் ஏக்கம் நிறைந்த குரல் துள்ளல். வைரமுத்துவே சொல்கிறார் : இத்தனை இளம் வயதில், இனிய முதிர்ச்சி வாய்ந்த சிறப்பான குரல். உங்களுக்கும் கேட்டவுடனே பிடிக்கும்.

படம் : கங்காரு
பாடலாசிரியர் : வைரமுத்து
இசையமைப்பாளர் : ஸ்ரீநிவாஸ்
பாடல் : பேஞ்சாக்கா மழ துளியோ…
பாடியவர் : ஸ்வேதா மோகன்

பேஞ்சாக்கா மழத் துளியோ மண்ணோடு
நான் வாழ்ந்தாக்கா வாழுவது உன்னோடு
சாய்ஞ்சாக்கா சாய்வது உன் தோளோடு
மூச்சு ஒய்ஞ்சாக்கா ஓய்வது உன் மார்போடு
என் ஏத்ததுக்கும்… ஏறக்கத்துக்கும்… என்ன கொற ?
நான் சேத்துக்குள்ள பூத்து வந்த செந்தாமர!

உன்ன ஒரு தலையா காதலிச்சா
தருதலையா சொல்லு தொற ?

சொத்து பத்து வேணுமுனு ஒன்ன கேட்டாளா ?
பத்து காசு நெத்தி பொட்டு போதும் கண்ணாளா!
காத்து மழக் குளிருக்கு ஒரு கம்பளி கேட்டாளா ?
கட்டிகிட்டு அணைக்கும் வெப்பம் போதும் கண்ணாளா
ஆள் வளர்ந்த ஆம்பளையே என்ன கண்ணெடுத்து பாரு
கண்ணுக்குள்ள நீரு – நான்
வெட்டி வச்ச கற்பு எல்லாம்
கொட்டி தாரேன், கூட இரு !

பேஞ்சாக்கா…

மூணு முடி கயிறு போட்டா
நான் உன் பொண்டாட்டி.
மூணு மொள கயிறு வேணும்
நீயும் இல்லாட்டி!
கட்டிகிட்டு காதல் பண்ண
எண்ணம் வராட்டி,
எட்டி நின்னு ரெண்டு
வார்த்த சொல்லு என்ன பாராட்டி!

அத்துவானக் காட்டுக்குள்ள
ஒத்தையில இருக்கேன்,
நான் ஒன்ன நம்பி இருக்கேன் !
உன் எச்சி சோத்த பிச்ச கேட்டு
ராப்பகலா நான் கிடக்கேன்

பேஞ்சாக்கா…

படத்தில் உள்ள மீதி பாடல்களை கேட்டு ரசிக்கவும். வரிகள் விரைவில் இசைப்பாவில் வெளிவரும். இசை என்னும் இன்பம் எங்கும் பரவட்டும்

பூவுக்கெல்லாம் சிறகு முளைத்தது…!

இசை வணக்கம்.

தொடர்ந்து மெல்லிசைப்பாடல்கள் இசைப்பாவில் வெளிவந்துகொண்டிருக்கின்றன. அவ்வரிசையில் இன்று இன்னுமொரு மெல்லிசையில் வருடும் பாடல். வித்யாசாகர் இசையில், வைரமுத்து வரிகளில்….

                            வைரமுத்து அவர்களின் இனிமையான காதல் கலந்த வரிகளில் இப்பாடலும் ஒன்று.வித்யாசாகர் இசையில் மென்மை கலந்த மெல்லிய மௌன வரிகளும் அசத்தலே ! பாடல் கேட்க கேட்க குரலின் மென்மையும் காதலை உணரச்செய்வதாய் இருக்கிறது.

vairamuthu

வித்யாசாகர்காதலன் காதலை எப்படியேனும் தன் காதலிக்கு சொல்லிவிடவேண்டும் என்ற அழகிய அவஸ்த்தையை  சொல்லி மாளாது தான் இருக்கும் இடத்தையே அழகு சொர்க்கம் ஆக்கிக் கொண்டு தன் காதலை வருணிக்க ஆரம்பிக்கிறான்.தான் கடக்கும் ஒவ்வொரு நாளையும் திருநாளாகவே எண்ணி ஒவ்வொரு நாளும் காதலை தெரிவிக்க காத்திருக்கிறான்.சொல்ல எண்ணியும் எப்படி தன் காதலை சொல்வதென்று அறியாது காதல் வலைக்குள் மேலும் பின்னிக்கொள்கிறான்.

வைரமுத்து பாடல்களில் பிடித்த ஒன்று என்றால் “பூவுக்கெல்லாம் சிறகு..”  இப்பாடலும் கண்டிப்பாக இடம் பெறும் எனது விருப்பப் பட்டியலில். அத்தோடு இசையமைப்பாளர் வித்யாசாகர் நீண்டகாலமாக தமிழ்த் திரையிசையில் பாடல்கள் அமைக்கவில்லை. நீண்ட இடைவெளிக்குப் பின்னர் இப்போது மீண்டும் தமிழ்த் திரையிசையிலும், கூடவே நமது இசைப்பாவிலும் இணைந்துள்ளார். இரு தளங்களிலுமே தொடர்ந்து இனிய பாடல்கள் வருமென நம்புவோம்! இசைப்பாவில் பாடகர்கள் ஸ்ரீநிவாஸ், கே.கே இருவருக்கும் இது முதல் பாடல்,

படம்:உயிரோடு உயிராக
பாடலாசிரியர்:வைரமுத்து
இசை:வித்யாசாகர்
பாடியவர்கள் :ஸ்ரீநிவாஸ்,கே கே

பூவுக்கெல்லாம் சிறகு முளைத்தது எந்தன் தோட்டத்தில்
விண்மீன் எல்லாம் நிலவாய் போனது எந்தன் வானத்தில்
முப்பது நாளும் முதூர்தமானது எந்தன் மாதத்தில்
முள்ளில் கூட தேன் துளி கசிந்தது எந்தன் ராகத்தில்
இது எப்படி எப்படி நியாயம்
எல்லாம் காதல் செய்த மாயம் ….(2)

(பூவுக்கெல்லாம் சிறகு ….)

நிலவை பிடித்து எறியவும் முடியும்
நீல கடலை குடிக்கவும் முடியும்
காற்றின் திசையை மாற்றவும் முடியும்
கம்பனை முழுக்க சொல்லவும் முடியும்

I love you love you சொல்லத்தானே
ஐயோ என்னால் முடியவில்லை

சுற்றும் உலகின் விட்டம் தெரியும்
சூரியன் பூமி தூரமும் தெரியும்
கங்கை நதியின் நீளமும் தெரியும்
வங்க கடலின் ஆழமும் தெரியும்

காதல் என்பது சரியா தவறா ?
இது தான் எனக்கு தெரியவில்லை

ஒற்றை பார்வை உயிரை குடித்து
கற்றை குழல் கயிறு செய்தது
மோதும் ஆடை முத்தமிட்டது
ரத்தம் எல்லாம் சுட்டுவிட்டது

I love you love you சொல்லத்தானே
ஐயோ என்னால் முடியவில்லை

மீண்டும் வசந்தம் எழுந்துவிட்டது
மீண்டும் சோலை குளிர்ந்து விட்டது
இதயம் இதயம் மலர்ந்து விட்டது
இசையின் கதவு திறந்து விட்டது

காதல் என்பது சரியா தவறா?
இது தான் எனக்கு தெரியவில்லை

(பூவுக்கெல்லாம் சிறகு …)

இசைப்பா +

இசையமைப்பாளர் வித்யாசாகர் 3 வயதிலிருந்து இசையைக் கற்றுக்கொள்ளத் துவங்கினார்.

இன்னுமொரு இனிய பாடலோடு விரைவில் இணைவோம்!

மழை மேக வண்ணா…

இசை வணக்கம்

2013- தமிழ் இசைக்கு ஏனோ  பெரும் இழப்புகளை அள்ளி வீசுகிறது. அதற்காக நாம் குறைப்படுவது உசிதம் அல்ல. காற்றில் கலந்த மேதைகளின் பாடல்களும், இசையும் நம்மை காப்பாற்றும், ஆறுதல் தரும் ஆலமாரமாக உள்ளது. அவர்களுக்கு நன்றி செலுத்தவும், இரங்கல் தெரிவிக்கவும், பெருமை பேசவும் இதுவே சரியான தருணமும் கூட. இச்சிறு தொண்டில் இசைப்பா இயங்கி வருவதில் மகிழ்ச்சியே.

வாலிவாலி : தலைமுறை தாண்டி எழுதிய கவிஞர். எழுத்தில் அவருக்கு பல முகங்கள் உண்டு. அனைத்து வகையான பாடல்களையும் எழுதியுள்ளார். அவரது பக்தி முகம் பலருக்கு தெரியும், ஆனால் அதன் விஸ்வரூபம் நாம் சரியாக அறியோம்.

2004-ம் ஆண்டில் வெளிவந்த ‘தேசம்’ படப்பாடல் இதோ உங்கள் செவிகளுக்கு. இப்படி ஒரு படம் வந்ததா ?? என்று போன மாதம் வரை நானும் கேட்டிருப்பேன். “ஸ்வதேஷ்” என்ற ஹிந்தி படத்தின், தமிழ் மொழியாக்க வடிவம் தான் இந்த “தேசம்”. பாடல்களை முதல் முறை கேட்டவுடனேயே அசந்து போனேன்… குறிப்பாக இங்கு உள்ள பாடலை ட்விட்டர்-ரில் பகிர்ந்து மகிழ்தேன். வைரமுத்து தான் இதை எழுதியிருப்பார் என்று நம்பினேன். கரணாம் : ARRருக்கு அதிகமாக மொழி மாற்று பாடல்கள் எழுதுவது அவரே. இருந்தும் ஒரு சந்தேகம். இணையத்தில் தேடினேன். பளிச்சென்று வாலி என்று விடை வந்தது. வாலியையும், பா விஜய்யையும் இப்படி தப்பாக எடைப்போடுவது என் வாடிக்கை.

கிராமத்தில் நடக்கும் தசரா பண்டிகை, அந்த விழாவில் அரங்கேறும் ராமாயண தெருக்கூத்து  பாடல். அசோக வனத்தில் இருக்கு சீதை பாடும் வரிகள், என்றுமே மனதை உருக்கும் சோக ரசம். திண்ணமான நம்பிக்கையுடன் சீதை ராகவனை எதிர்நோக்க… ராவணன் வந்து அவளை நிர்பந்தம் செய்கிறான். இறுதியில் ராமர் வந்து சேர்கிறார். ஜெயமும் அவர் கூட வருகிறது.

மிகவும் ரம்மியமான வரிகள். நாலாயிரம் படித்தவருக்கு, இது எல்லாம் இயல்பாக வந்து அமைகிறது. கவிதையை நான் மேலும் சிலாகிக்க போவதில்லை. (என்னை போல நீங்களும்) அனுபவியுங்கள் : வாலியின் கவி மணம் சேர, சித்ராவின் மதுர குரல் வளம் குழைய, ARRரின் இசை மேளம் கொட்ட, பாட்டு படு பிரமாதம். #IAmHooked கவிஞர் வாலி ஒரு சகாப்தம்

படம்: தேசம்
இசை: AR ரஹ்மான்
பாடியவர்கள்: சித்ரா, ஸ்ரீநிவாஸ்
வரிகள்: வாலி

(கோதை கதறல்)

மழை மேக வண்ணா
உன் வைதேகி இங்கே.
பூவை மன்றாட அன்பே
உன் அருள் எங்கே ?

நா விழும் வார்த்தையோ
ரகுபதி ராமனன்றோ…
பூஜை மனம் தான் – கூவி
போற்றும் ஜெய ராமனன்றோ…

ராம நாமம் ஜெபித்தென்றும்
உள்ளமிது தேம்பிடாதோ…
ராம நாமம் ஜெபிதெங்கும்
உள்ளமிது ராமா…

பல ராட்ஷச நங்கை
இனமேவிய (இ)லங்கை
நெஞ்சம் தினமுறங்காதோ?
உன்னை அழைக்காதோ?
தூண்டில் புழுவாய்
மங்கை துடித்தாள்

(மழை மேக….)

(இராவணன் வருகிறான்)

நான்முகன் பேரன்
இலங்கை சூரன்
வந்தான் இங்கே!
கண்கள் ரெண்டில்
கனலைப் பார்
காட்டு தீயாக!

(இராவணன் கூற்று)

உன் ஜபம் தானோ
ராம நாமம்
உன் கதி தானோ
ராம நாமமும்..

ராம நாமம் தான்
ரக்ஷிக்கும் எண்ணம்
ஏனடி கண்ணே ? –

சீதா…….. சீதா !

புவியில் யாவும்
என் ஆட்சி !
என் உயிர் பெண்ணே.

(சீதையின் கற்பு வரிகள்)

என்னுடைய ஒரு சொல்லே
உன்னை தீர்க்கும் – நீ
எண்ணிடுக இலங்கேசா!
தசரதன் மகன் வில்லுக்கு
இழுக்காகும் – அவன்
அயோத்தி மகராசா!

மலரினும் மென்மை
மழலையின் தன்மை
வரிவில்லின் திண்மை
வெண்ணிலவின் தண்மை

எவர் வந்து களங்கம்
விளைத்தாலும்,
பெரும் எரிமலை
பெண்மையடா !

(ராகவன் வரும் வர்ணனை)

பத்து தலைகளை தீர்க்க,
திரு மார்புகள் ஆக்க,
ஸ்ரீ ராஜா ராம் – இங்கு
அம்பிடலாம் – அந்த
இளையோன் லக்ஷ்மணன்
அண்ணன் பின்னே !

மழை மேக…

(இராவணன் இறுமாப்பு)

ராமன் மேல் ஆசை எதற்கு
ராமன் பேர் தான் ஆதாரமோ
உன் உயிர்காதல் அவன்தான்
ஊர் மெச்சும் வீரனோ?

என்னை அழிக்க ஆகுமா ? – அடி
நான் அலை பொங்கும் கடல் !
நான் மனம் போல் கொஞ்சம் மானே,
ராமனா என்னை மாய்ப்பது?

(ராமனின் உருகும் கோதை)

ராமன் எனது மனதின் மன்னன்,
ராமனே இரு கண்மணி,
ராமன் பேரே ஏத்தும் பெண்மான்,
ராமன் என் ஜீவன் என்பேன் !

ராமன் தழுவ மஞ்சள் மேனி
ராமனே எந்தன் சுவாசமே!
ராமனல்லால் ஷேமம் ஏது?
ராமன் தான் இங்கு யாவுமே!

(கூத்தின் கருத்தை சொல்லும் கவி)

ஓ ஓ ஓ
நன்மை என்னும் நல்ல மனதில்,
நின்றான் பார் ராமனே.
தீமையற்ற நெஞ்செல்லாமே,
பார்க்கலாமே ராமனை.

ராமன் பண்பை சொல்கிறேன்
எல்லோருக்கும் பிரிய நண்பனே
தீயசெயல் தான் பாவ ராவணன்
ராமன் என்றால் பண்பு தான்

ராமன் என்றால் பண்பு தான்
ராமன் பேரே பண்பு தான்
ராமன் சீரே பண்பு தான்
ராமன் பேரே பண்பு தான்

ராமன் சொல் தான் கனிமொழி
ராமன் தானே இருகண் விழி

மாற்று ராவண குணமனைத்தும்
ராமன் உந்தன் பார்வையில்
மாற்று ராவண குணமனைத்தும்
ராமன் உந்தன் பார்வையில்

(ராகவன் விஜயம், வெற்றி)

ஒ ஒ ஒ ஓ ஓ
அ அ அ ஆ ஆ
ஒ ஒ ஒ ஓ ஓ
அ அ அ ஆ ஆ
ஒ ஒ ஒ ஓ ஓ

(மழை மேக…)

(இறுதி யுத்தம்)

ராஜா ராமனும் வந்தார்
சீதா ராமனும் வந்தார்
ராஜா ராமசந்திரன் வந்தார்
ஸ்ரீ ராமசந்திரன் வந்தார்

ராமனும் வந்தார்
ராஜா ராமனும் வந்தார்
ஸ்ரீ ராமச்சந்திரன் வந்தார்…

(இராவண வதம்)

ராஜா ராமனும் வந்தார்
சீதா ராமனும் வந்தார்
ராஜா ராமசந்திரன் வந்தார்
ஸ்ரீ ராமசந்திரன் வந்தார்

ராமனும் வந்தார்
ராஜா ராமனும் வந்தார்
ஸ்ரீ ராமச்சந்திரன் வந்தார்…
ஹோ…..!

‼♪♫►->>>>>பாடலை கேட்க பதிவிறக்க<<<<<-◄♫♪‼

பாடலின் ஹிந்தி வீடியோ

பாடலை முதற்கொண்டு, அடம் பிடித்து மூன்று மணி நேரம் ஹிந்தி subtitle “ஸ்வதேஷ்” படம் பார்த்து முடித்தேன். பாடலின் மிகப்பெரும் வெற்றிகளில் இதுவும் ஒன்று. தமிழகத்தில் இந்த பாடல் பிரபலம் அடையாத காரணம் தெரியவில்லை. ஒரு முறை கேட்டு விட்டு சொல்லுங்கள், உங்கள் கருத்தை. அன்று ராமனை உணர்ந்த வாலி இன்று பிராட்டியின் அருளும் பெற்று, அவள் கதையையும் கவி பாடி விட்டான்.

இசைப்பா+

பொருள் கொண்ட பேர்கள் மனம் கொண்டதில்லை,
தரும் கைகள் தேடி பொருள் வந்ததில்லை…
மனம் என்ற கோவில் திறக்கின்ற நேரம்,
தவறாமல் அங்கே தெய்வம் வந்து சேரும்
– கவிஞர் வாலி

இன்னும் வாலியின் இனிய பாடல்களை தொடர்ந்து இசைப்பாவில் தர முடிவு செய்துள்ளோம். பெருங்கவிஞரின் மறைவுக்கு இசைப்பாவில் இசையஞ்சலியாக அது அமையும்.

ஆழ்ந்த இரங்கலுடன்,
இசைப்பா குழுவினர்

மேலும் வாலி பாடல்களுக்கு (படத்தை) சொடுக்கவும்:

cooltext1123981540

கையில் மிதக்கும் கனவு! ! !

வணக்கம்.

இன்று ட்விட்டரில் எதேச்சையாக சுற்றியபோது பிடிபட்ட செய்தி இன்று கவிஞர் வைரமுத்து அவர்களுக்கு இன்று பிறந்தநாள் என்று. 6000 நெருங்கும் அவரின் பாடல்களில் சில இசைப்பாவில் ஏற்கனவே உள்ளன. vairamuthuஅதன் சுட்டி கீழே உள்ளது. 1980-ல் நிழல்கள் மூலம் (இது ஒரு பொன்மாலைப் பொழுது) அறிமுகமான இவர் ரோஜா படம் மூலம் ரஹ்மானுடன் இணைந்து பல சிறப்பான வெற்றிப்பாடல்களைத் தந்ததும் தெரியும்.

இப்பாடலும் கேட்ட மாத்திரத்தில் ஈர்க்கும் பாடல்தான். நுரையால் செய்த சிலை போல மென்மையானவள் என்று சொல்கிறார். காற்றுக்கு கையும், காலும் முளைத்தால் எப்படியிருக்கும் என எண்ணச் சொல்கிறார். பெண் என்பவள் மென்மையானவள் என்பதை வரிகளின் ஊடே பதிவு செய்கிறார். இதை கடந்து சென்றால், அறிவியல் பாடமும் பாடலில் உண்டு. நிலவில் எடை குறைவாகத் தோன்றும். நீரின் உள்ளேயும் பொருட்கள் எடை குறைவாகத் தோன்றும். அதைப் போல…… சரி பாடலில் கேளுங்கள்.

ஒரே குறை பாடலின் காட்சியமைப்புதான். இத்தனை சிறப்புகளும் கொண்ட  பாடலின் காட்சிகள் அத்தனை சிறப்பாய் இல்லை. எதிர்பார்ப்பு மொத்தமாய்ப் போனது எனக்கு (தமிழ்). இசைப்பா எப்போதும் இசையையும், வரிகளையும் மட்டுமே கவனத்தில் கொள்ளும் என்பதை அழுத்தமாக இங்கே பதிகிறோம். காட்சியமைப்பு என்பது அடுத்த நிலை.

அடுத்தது பாடகர் ஸ்ரீநிவாஸ் அவர்களுக்கு இது இசைப்பாவில் அறிமுகப் பாடல்.  ரஹ்மானின் இசை பற்றி பேசவும் வேண்டுமோ? அத்தனை ரம்மியமான இசை. உறங்க வைக்க, கிறங்க வைக்க ஒரு இசை இப்பாடலில் இருந்து வெளிப்படும். கண்களை மூடி இசையில் கரையுங்கள்.

பாடல் : கையில் மிதக்கும் கனவா நீ !
இசை : எ ஆர் ரஹ்மான்
வரிகள் : வைரமுத்து
பாடியவர் : ஸ்ரீநிவாஸ்
படம் : ரட்சகன்

கனவா… ? இல்லை காற்றா ..?
கனவா…?  நீ காற்றா ..?

கையில் மிதக்கும் கனவா நீ?
கை கால் முளைத்த காற்றா நீ?
கையில் ஏந்தியும் கனக்கவில்லையே !
நுரையால் செய்த சிலையா ?- நீ

இப்படி உன்னை ஏந்தி கொண்டு
இந்திர லோகம் போய் விடவா?
இடையில் கொஞ்சம் வலி எடுத்தாலும்ம்ம்ம்ம்
சந்திர தரையில், பாய் இடவா?

கையில் மிதக்கும் கனவா நீ?
கை கால் முளைத்த காற்றா நீ?
கையில் ஏந்தியும் கனக்கவில்லையே !
நுரையால் செய்த சிலையா? – நீ

நிலவில் பொருள்கள் எடை இழக்கும்
நீரிலும் பொருள் எடை இழக்கும்
காதலில் கூட எடை இழக்கும்
இன்று கண்டேன் அடி
அதை கண்டு கொண்டேன் அடி

நிலவில் பொருள்கள் எடை இழக்கும்
நீரிலும் பொருள் எடை இழக்கும்
காதலில் கூட எடை இழக்கும்
இன்று கண்டேன் அடி
அதை கண்டு கொண்டேன் அடி

காதல் தாய்மை இரண்டு மட்டும்
பாரம் என்பதை அறியாது !

உன் பளிங்கு முகத்தை பார்த்து கொண்டால்
பசியோ வலியோ தெரியாது !

காதல் தாய்மை இரண்டு மட்டும்
பாரம் என்பதை அறியாது !

உன் பளிங்கு முகத்தை பார்த்து கொண்டால்
பசியோ வலியோ தெரியாது !

உன்னை மட்டும் சுமந்து நடந்தால்,
உயரும் தூரம் தெரியாது !
உன்னை மட்டும் சுமந்து நடந்தால்,
உயரும் தூரம் தெரியாது !
உன்னில் மற்றொரு பூவு விழுந்தால்,
என்னால் தாங்க முடியாது !

கையில் மிதக்கும் கனவா நீ
கை கால் முளைத்த காற்றா நீ
கையில் ஏந்தியும் கனக்கவில்லையே !
நுரையால் செய்த சிலையா? – நீ

கையில் மிதக்கும் கனவா நீ?
கை கால் முளைத்த காற்றா நீ?
கையில் ஏந்தியும் கனக்கவில்லையே !
நூரையல் செய்த சிலையா? – நீ

கனவா…? இல்லை காற்றா ..?
கனவா…? நீ காற்றா ..?

இசைப்பா +

கவிஞர் வைரமுத்து இதுவரை ஆறுமுறை தேசிய விருது பெற்றிருக்கிறார்.

கவிஞர் வைரமுத்து அவர்களுக்கு மீண்டும் ஒருமுறை பிறந்தநாள் வாழ்த்துகளைக் கூறிக் கொள்கிறோம். பதிவினை, தளத்தினை மேம்படுத்தும் வகையில் உங்கள் கருத்துக்கள், திருத்தங்களை எப்போதும் போல வரவேற்கிறோம்.

இசைப்பாவில் வைரமுத்து:

நன்றி.